【Now Sports】香港時間周一凌晨,歐洲12間球會宣佈自組歐洲超級聯賽(ESL)。一日之內,UFEA、FIFA同各地方聯賽都提出反對,消息指,效力該12支球會嘅球員將不能代表國家隊出賽,之後發展係英超Big 6受到英國政府及球迷施壓退出,ESL官宣暫時停止,因為要重整計劃。霸權之戰,兩邊都係吸金惡魔,球迷真係有得揀?
撰文:步大力熊
雖然歐洲超級聯賽可能搞唔成,但UEFA威脅行為再次睇到,明知球員對球會嘅決定冇話事權,歐洲足協仍然將佢哋作為籌碼,阻止歐超聯;球隊用世界球迷,贊助商做籌碼,似乎都想對抗「腐敗」嘅UEFA,球迷反應不一,但都明白係為錢多過為足球。其實球會爭取嘅除咗係啖氣,最重要都係錢。會唔會好似英超當年成立一樣,除咗轉播權,仲想要更多話事權?拒絕UEFA一言堂?雖然明知唔係為球迷,但都可以嘗試理解一下,點解球會要反抗,對付霸權可能只有霸權。
見到歐超聯組成,的確係覺得:又多個聯賽? 球員都已經好攰,仲要加重佢哋嘅壓力?而且年年都一樣15隊加5支邀請隊伍,有無可觀性?無降班係咪令榜尾球隊踢風流波?定其實會唔會好似國際冠軍盃(ICC)嘅聯賽版?點解冇人反對ICC但要反對歐超聯? 又係因為錢同利益。
見到UEFA新歐聯賽制要增加到百幾場比賽及36隊打聯賽形式之後,就知道其實12支球隊都係想自保收入。如果俾UEFA 控制,增加賽事而要同更多隊分錢,球員數目及收入又冇增加,不如自己嚟。因為大球會先係贊助同球迷保證,唔想同其他球會唔公平咁分。如你見到弱隊抽到強隊會開心笑嘅畫面,因為對強隊可為小球會增加關注度同門票、轉播收益,對強隊就無著數可言。
UEFA近年增添常規比賽
另外因為UEFA一直強推政策,唔理球會嘅意見,導致依家要犠牲傳統球賽,用球員同球迷作為兩者對奕嘅籌碼。UEFA為增加比賽可觀性,公佈改變歐聯歐霸,加入第3級別賽事UEFA Europa Conference League。國際賽事上,早年亦加入歐洲國家聯賽,而且安排喺國際周期間進行資格賽。雖然UEFA聲稱可以畀年青球員更多上陣機會,但各國家代表隊一心爭標, 其實都會出大國腳。
國際賽傷患問題
當然UEFA收入亦增加,但責任就落於球會身上。 因為伴隨嘅係各球員喺國際周入面嘅傷患或倦怠情況增加,導致球員因傷缺席正常地方聯賽,球迷已一早予以FIFA病毒惡名,而球會要一直出糧畀受傷球員,更要負責球員康復工作。好多時球員一好番,國家隊又會徵召球員,然後再傷患,無限循環。
多咗國際賽事,球會當然冇錢分。暑假亦要遷就國際賽球員,而未能出席球會暑期表演賽,進一步影響收入。(如C朗2019年踢完首屆歐洲國家聯賽就跟祖記飛去亞洲進行表演賽,結果太攰,領隊畀佢休息,冇踢到韓國嗰場比賽。當地球迷告上法庭,仲勝訴。)
疫情影響
疫情持續影響球會收入,各項賽事雖繼續,UEFA因為疫情完全唔畀球迷入場,門票零收入。UEFA 仍冇將轉播收益分配更多出嚟支持球隊營運,而皇馬會長佩雷斯更指出,UEFA欠透明度,高層有無因為疫情減少薪酬亦無法得知。球會仍然運作,人工照出,有球星願意減薪續約,但UEFA並無提供協助。
球迷仍然希望球會來季買球員、贏錦標,除咗有班主/金主嘅球隊,一般球隊都難以生存,而歐洲超級聯賽就係為保收入而生。UEFA 嘅Jesper Moller周二更加話過將皇家馬德里,車路士及曼城踢出今季嘅4強賽事。咁係咪代表巴黎聖日耳門可以奪冠?冇人知!但帶頭搞歐洲超級聯賽嘅佩雷斯就話UEFA冇可能踢走歐聯球隊。UEFA會唔會咁做, 真係唔知,但車仔曼城已妥協,威脅睇嚟係有用。
不是足球革命,但有警示
喺呢個分錢嘅對奕,球迷同球員都只係籌碼。雖然唔係聖戰亦唔係足球革命,但事實證明要推翻一件事,無人可以獨善其身,依家霸權對政權,結果可能會比雞蛋對高牆好,至少關注度,100分!幾日內球壇動盪,有人被炒,有人傳賣盤,英國政府都出聲阻止,更傳出UEFA畀錢英超Big 6叫佢地撤回!就算歐洲超級聯賽搞唔成,都絕對畀咗UEFA一個好大嘅警示!個人好享受歐聯決賽嘅氣氛,亦覺得愛隊參加其中係一種榮耀。歐聯舊制其實幾好,其實冇需要再大改,令本來頻繁賽程更頻密。
大家都好奇退出球隊要唔要賠償?歐超聯兼皇馬會長佩雷斯會唔會因為歐超聯壽終正寢,令皇馬喺UEFA比賽有麻煩? 歐聯4強戰可能會有答案。
撰文:步大力熊
要做一個理性球迷?不了,成為球迷本身就是一件不理性而且瘋狂的事。
email:ballthirteen@hotmail.com
歡迎瀏覽球十三fb專頁若得到波友一個like就是我們團隊的一大鼓舞:
www.facebook.com/ballthirteen