【Now Sports】早前足球網站433喺IG post 咗一段馬些路同基斯坦奴朗拿度喺班拿貝慶祝歐聯13冠嘅片段。馬些路 回覆話“ Soon”。繼賓斯馬，施丹後，名宿及皇馬總監布達堅奴亦表示: “ We'll see.” 之後又到馬些路，而且剛剛C朗女朋友洛迪古絲IG story 都post 咗C朗Jr 同馬些路囝囝Enzo 喺C朗馬德里嘅屋企踢波。傳到咁，其實都引起一眾球迷極大反應同討論。
撰文：步大力熊
與此同時，加利夫巴爾（Gareth Bale）剛剛接受訪問，佢表示去熱刺其實係為咗踢波，佢想爭取出場機會去迎戰今個夏天嘅歐洲國家盃，之後佢都係計劃返皇馬完成合約嘅。皇迷聽完巴爾咁講，真係有啲嚇親。如果基斯坦奴朗拿度（Cristiano Ronaldo）同巴爾都返嚟，係咪再會同賓斯馬組成歐聯3冠嘅「BBC」？ 但事過境遷，反而畀網民笑係咪要組元老隊？
有球迷表示想C朗回歸，但唔係核心，希望佢可以喺皇馬掛靴，但都擔心薪酬問題會令皇馬引入唔到新星，令到當初年輕化球隊嘅想法回背道而馳。不過祖雲達斯副會長尼維都表明C朗今個夏天會繼續留低。
而一直傳皇馬想今個夏天引入新星，再打造銀河艦隊3.0。呼聲最高就係多蒙特嘅賀蘭同巴黎聖日耳門嘅安巴比，從而增加鋒力，但兩位轉會費嘅標價都非常高。如果皇馬想引入其中一個或兩個，除咗要同各球會搶，仲要先處理巴爾薪酬同合約問題，但巴爾一直表明唔會減薪，亦想回歸皇馬，所以引入重磅新星相信會有阻滯。
到底下季皇馬會唔會有C朗同巴爾回歸，等「BBC」重現？ 定引入新星？如果只可以二選一，我認為皇馬應該要以年輕化球隊為主，盡量今夏賣走唔啱（施丹）用嘅球員，儲多啲銀彈，加強鋒線嘅攻擊力。
撰文：步大力熊
要做一個理性球迷？不了，成為球迷本身就是一件不理性而且瘋狂的事。
email：ballthirteen@hotmail.com
歡迎瀏覽球十三fb專頁若得到波友一個like就是我們團隊的一大鼓舞：
www.facebook.com/ballthirteen
