0
0
【鏟草男女】炒施丹不如認清問題

【鏟草男女】炒施丹不如認清問題

【鏟草男女】炒施丹不如認清問題

【Now Sports】周中皇家馬德里對薩克達嘅歐聯B組,薩克達因為正選隊伍有10位球員中咗2019新冠病毒,無奈只可以派青年軍上陣。皇馬嘅出場名單上亦作出變動,沙治奧拉莫斯因傷休息連大軍名單都無份;陣容方面,施丹收起長期正選嘅賓斯馬,前場左中右放咗阿辛斯奧、約域同洛迪高;後場用咗踢開左閘嘅文迪踢右閘,而美列度奧就踢中堅位置。都算係新鮮嘅配搭,但可惜唔奏效。

撰文:步大力熊

比賽內容相信大家已經喺四方八面睇到,簡單講,大致上係上半場皇馬行軍速度慢,進攻時回防不及;後防組合可能太新,明顯非常唔夾,常常不在位置;皇馬球員常回傳,只想用兩邊跑到底線斬波,祈求有人喺門前頂入或者射入。反觀被薩克達年輕小將用波,傳波都淡定,而且速度快時時搵到機會快速反擊。上半場以0:3 結束,下半場摩迪同雲尼斯素斯各入一球,可惜都係無法挽回。連補時華維迪嘅最後一擊都俾VAR 駁回,皇馬以2:3落敗。

上半場真係嚇親皇馬球迷,而對最終依然落敗更加非常之嬲。施丹賽後都少有咁唔再耍官腔而直接承認係出現咗問題。「我覺得自己有能力改變呢個情況亦會嘗試。我要負責。上半場真係好差。我有啲嘢冇做啱,但我哋唔會放棄。呢個係一個困難嘅敗仗,一個唔好嘅晚上,但我相信呢隊波。」

有球迷及媒體指星期六國家打吡會決定施丹命運,但如果話要炒施丹,皇馬其實更應該趁呢個機會認清自身問題。

1. 傷患問題

球員比賽時受傷無可避免,但皇馬更應該正視球員訓練時受傷問題。今場施丹用咗慣用左腳嘅文迪踢右閘,明顯令文迪發揮空間有限,而事緣係正選右閘卡華查同埋後備右閘奧迪里奧蘇拿3星期前喺訓練時,前後一日受傷,而夏沙特亦係經過一陣子嘅康復訓練後,當可以上場時,又再次喺團隊訓練受傷,亦一直未有可以再上陣嘅時間表。

球員反覆收傷到底係球員未完全康復,就要接受強度訓練定其他原因,球迷無從考究。而皇馬內部亦無傳出對醫療或者訓練團隊不滿嘅新聞。當然亦有指醫療團隊係因為商業而一直沿用。

2. 球員老化,年輕球員出現斷層

場上有多位3冠功臣係不爭事實,但球員年齡已經唔係兩三年前嘅時候。今場明顯見到馬些路踢得好吃力,間中叉腰喘氣;而平日摩迪夾上卡斯米路同卻奧斯(KMC)更加係會拖慢速度。球場上反應慢半拍就可能錯失一個身位,令欄截唔成功,或者失去控球權。一遇上非常跑得嘅年輕小將,就好容易俾人打反擊,將單刀機會送咗畀對手。

好彩暫時KMC有經驗同技術搭救,但長遠中場只得華維迪一個年輕人亦唔會令速度增加。施丹本來諗住用嚟替摩迪嘅奧迪哥特季初由皇蘇回歸時一直帶傷,今個月踢完國家隊再傷,令人擔心。

前場巴西孖寶及阿辛斯奧間中有好表現,但未算非常穩定。例如巴西孖寶喺應接賓斯馬嘅傳送都未如理想,而佢哋都係未可以穩定咁助攻賓斯馬。約域更加係難有表現,施丹嘗試畀佢上陣,但一係運氣唔夠中柱或越位,又或者唔知點樣協助進攻,有少少等波到嘅情況。

3. 進攻欠多元化

永遠只係見到中場回傳或派波到兩邊,左右閘跑到近底線再傳中。無論傳中或角球,球隊以前有拉莫斯,華拉尼,賓斯馬,基斯坦奴朗拿度同巴爾5個主要搶點,依家少咗兩個,令每場賓斯馬都俾人mark 實,而其他前場中場球員亦冇身高優勢去頂入,要拉莫斯、華拉尼上前幫手,一不小心又可能將反擊或單刀機會送俾人,辛苦兩位左右閘。但唔知咩原因,施丹依然堅持用呢一個戰術而唔去開發下中路進攻。

當然唔係完全無原因,因為行軍速度慢,令對手更容易防守,皇馬打快速反擊嘅攻勢亦已經買少見少。而對手已經跑晒返黎,中路被封,只好又用返兩邊傳中去拉開空間。打用得多就俾人睇穿晒。

4. 防守問題

多年嚟皇馬都係攻強守弱,主要靠歷代龍門去把關,無論卡斯拿斯,基羅拿華斯,及呢兩季神勇嘅古圖都係好優秀嘅龍門。而頭先進攻講嘅兩位中堅跑去幫手頂角球,亦令球隊間中出現俾人快攻時回防唔切嘅情況。

數據顯示,無拉莫斯嘅歐聯比賽,8場有7場都係敗陣,而近兩場歐聯,華拉尼無咗拉莫斯喺旁邊都出現犯錯,可見拉莫斯嘅重要性。相反地,施丹回歸後馬些路正選上陣嘅8場比賽,8場都係敗仗收場。係咁啱定真係有玄機?

相信球隊依家依然係重建階段,今年亦係40年嚟首次無買入球員,但以上問題依然需要球隊同球員一齊正視,講分組賽出線機會言之尚早,但今年皇馬想繼續爭標就要及早求變。

撰文:步大力熊

要做一個理性球迷?不了,成為球迷本身就是一件不理性而且瘋狂的事。

email:ballthirteen@hotmail.com

歡迎瀏覽球十三fb專頁若得到波友一個like就是我們團隊的一大鼓舞:

www.facebook.com/ballthirteen

圖片來源 : ©AFP

  1. 更多
  1. 再多7個場所涉歌舞群組 累計309人確診
    再多7個場所涉歌舞群組 累計309人確診
    5小時前
  2. 【附名單及地址】政府刊憲曾到七個指明場所人士須周日前強制接受檢測
    【附名單及地址】政府刊憲曾到七個指明場所人士須周日前強制接受檢測
    41分鐘前
  3. 【11月26日疫情速報】(23:40)
    【11月26日疫情速報】(23:40)
    1小時前
  4. 英國倫敦地區將實施第二級防疫措施
    英國倫敦地區將實施第二級防疫措施
    1小時前
  5. 陪審團裁定張祺忠謀殺罪成 下周四判刑
    陪審團裁定張祺忠謀殺罪成 下周四判刑
    1小時前
  6. 【政情】境外投票急「收油 」 宣誓修例先上議程
    【政情】境外投票急「收油 」 宣誓修例先上議程
    2小時前
  7. 【招聘啟事】主播/記者
    【招聘啟事】主播/記者
    3小時前
  8. 張祺忠涉殺妻案 陪審團以5比2裁定謀殺罪成
    張祺忠涉殺妻案 陪審團以5比2裁定謀殺罪成
    3小時前
  9. 通識教育教師聯會憂改革後會削弱學生學習意欲
    通識教育教師聯會憂改革後會削弱學生學習意欲
    3小時前
  10. 王毅傳達習近平口信:重視與文在寅的友誼及互信
    王毅傳達習近平口信:重視與文在寅的友誼及互信
    4小時前