皇馬2：0贏「特」

【Now Sports】皇家馬德里憑雲尼素斯和賓施馬上、下半場各入一球，作客2:0贏波。

周日西甲賽事，由利雲特主場對皇家馬德里。皇馬今戰排出4-3-3陣式，前線派出賓斯馬、雲尼素斯和阿辛斯奧，中場有摩迪策動進攻。

上半場雙方互有攻守，戰至16分鐘皇馬先開紀錄，雲尼素斯接應角球右腳射遠柱入，客隊領先1:0。落後下的利雲特亦有扳平機會，30分鐘胡錫域小禁區頭槌埋門中楣。尾段皇馬有費達歷高華維迪和賓施馬起腳亦未能得手，半場皇馬領先1:0。

下半場戰況相若，52分鐘雲尼素斯6碼點起腳斜出；3分鐘後賓斯馬左路地波傳中，雲尼素斯再次近射出界，兩度錯失黃金入波機會。那邊廂利雲特亦有中場巴迪58和61分鐘兩記遠射，差點收死古圖奧斯。

67分鐘沙治奧拉莫斯接應摩迪罰球傳中一頂破網，但由於拉莫斯跳頂前推人在前被判詐糊。利雲特尾段加強攻力，77分鐘巴迪禁區轉邊至左路卡路士奇勒近射，被出迎的古圖奧斯救出。主隊未能收復失地，相反皇馬補時階段一次突擊，賓施馬單刀埋門埋齋，最終皇馬作客小勝2:0，全取3分。