【Now Sports】西班牙時間星期二晚上,傳出美斯向巴塞隆拿發出傳真,要求離開及希望巴塞履行合約條款第24,一項容許美斯可以喺季尾自由轉會嘅條款。不過初步巴塞以條文喺2020年6月10號(原本嘅季尾)已經過期嚟拒絕美斯要求,唔通真係要對簿公堂嚟解決?
喺巴塞效力20年嘅美斯會唔會走?定係美斯只想用苦肉計想逼走會長巴度姆?
呢個西甲班霸同曼城、巴黎聖日耳門唔一樣,巴塞係由球迷擁有嘅球會,所以會長巴度姆係球迷們選出嚟嘅,當然都可以由球迷去罷免。由星期二晚開始,大批球迷去到魯營外面抗議要求會長下台及想挽留美斯,但暫時未見罷免消息。
其實上月20號, 巴塞喺歐聯8強未大敗畀拜仁慕尼黑之前,ESPN就訪問過一個巴塞當地有投票權嘅球迷團體Cor Blaugrana,佢哋曾經希望提出對巴度姆嘅「不信任動議」去罷免佢,報道內佢哋表示相當困難,到底點先可以做到?
原來當提出正式動議後,動議人士將有14日時間收集15%會員嘅簽名,大概係1.7萬人。動議後而需要1.54萬會員入面有3分之2同意動議先可以正式舉行投票,而投票亦需要會員親身到魯營。
最後Cor Blaugrana未有啟動相關動議,而西班牙當地星期三,下屆參選人Jordi Farre就開始咗動議,依家籌集緊1.7萬簽名。但疫情下,叫人簽名就難好多了,亦未知程序會唔會因疫情改變。
但消息指出,早排巴度姆送咗唔少會籍畀海外球迷。因為巴塞會員socis除咗係世襲制度外;海外球迷,巴塞官網表示只要申請「commitment card」,以及連續每年指定時間到巴塞辦公室續會,都有資格申請成為會員。如果不能連續去3年嘅話,就會失去資格。疫情關係,巴度姆可能因辦公室無開,所以海外會員就可以免卻呢個手續。但可能結果導致巴塞本地球迷未能開始動議程序。咁算唔算種票呢?
不過無論點都好,美斯都未必可以自由身去,而下年3月巴塞就會重選會長,到時巴度姆都無辦法留任。但巴塞就失去咗一季時間去重組,及留低咗一個心灰意冷嘅球員,對球迷嘅傷害咁大,巴塞損失都唔少……
撰文:步大力熊
要做一個理性球迷?不了,成為球迷本身就是一件不理性而且瘋狂的事。
本欄逢周二及周四上載
周二 歪花
周四 步大力熊/泰萊
email:ballthirteen@hotmail.com
歡迎瀏覽球十三fb專頁若得到波友一個like就是我們團隊的一大鼓舞:
www.facebook.com/ballthirteen