【Now Sports】一年多前球王施丹來一記「施丹轉身」,重掌皇家馬德里帥印,皇家馬德里香港球迷會女會長June當時接受sports.now.com專訪,對施丹回歸心存感激;事隔一年許,June再度受訪,為愛隊重奪西甲冠軍表示興奮,以下是訪問內容:
問:今季皇馬奪冠關鍵係咩?
June:本來諗住有夏沙特幫手,見佢同賓斯馬都幾夾,不過季中受傷,搞到施丹要出其他球員,反而令到皇馬今季實力同攻守更加平均。疫情令本來疫倦嘅球隊可以休息一下,阿辛斯奧又傷癒復出,另外班拿貝冇咗主場壓力都有啲幫助,因為皇馬之前主場數據比較差。另外,巴塞攻力好強但防守好弱咗,而佢哋有內部問題;馬德里體育會防守依然咁強,但冇咗射手(基斯文),但有啲影響。以上都係皇馬奪得西甲嘅關鍵。
問:邊個球員功勞最大?
June:有3個,分別係賓斯馬、沙治奧拉莫斯同埋古圖奧斯。賓斯馬上季冇基斯坦奴朗拿度後好似一路唔係好習慣,今季了解到自己要擔大旗,而施丹亦對佢好信任,場場畀佢落場,而佢都冇令我哋失望,大部份時間發揮得唔錯,入球數字直逼美斯,可能要鬥到最後一日至知(神射手)結果。就算唔計12碼,隊長拉莫斯入球依然係隊內第2多,而佢防守同帶領球隊方面都見隊長風範。古圖奧斯喺歐聯不適後愈戰愈勇,好多場都零封,正向金手套進發。
問:本季邊場波/入球最難忘?
June:係首循環作客華倫西亞,喺最後1分鐘,皇馬有個角球,好難忘古圖奧斯自己出嚟幫手頂,雖然頂中冇入,但由賓斯馬補中。呢1分好重要,因為(爭霸)係幾分上落。呢球係我比較難忘,施丹後來話唔係佢叫古圖奧斯去頂,而係古圖奧斯自發要出去幫手,展現皇馬合作同團隊精神令我好感動。
問:球迷會如何慶祝?
June:因為限聚令,而皇馬亦呼籲球迷唔好因為扲冠軍而令疫情惡化,所以等疫情過後再作決定。
問:來季展望/估計或最想咩球員加盟?
June:希望球隊加強把握力,球隊攻力夠,但見到好多門前失機,只係靠賓斯馬同埋拉莫斯入波都好吃力。自己希望球隊可以加個防中球員,因為卡斯米路好需要有人輪換。冇特別諗想咩球員加盟,希望睇吓(外借兵)奧迪加特有冇機會回歸,其實摩迪同卻奧斯都需要人輪換。摩迪仲可以踢得好好,但如果連續踢幾場都有疲態。久保建英雖然厲害,但仲可以喺其他球隊踢多陣,唔會要坐喺後備席,呢個都係皇馬嘅問題。占士洛迪古斯長坐後備,雖然施丹話對每個球員一樣,但就係睇到佢冇得出場,另外加利夫巴爾都係好球員,但可能已經唔適合球會,唔知去或留。作為球迷,見到有功勞球員最後都冇得出場,或者成日做後備,個心都唔係咁好受。希望呢方面球隊都有啲改變。
皇家馬德里香港球迷會
https://www.facebook.com/realmadridhkfc/