姿勢分都贏晒。
(©AFP)
【Now Sports】6年前今日的世界盃分組賽，雲佩斯變身「飛將軍」頂入靚波，協助荷蘭以5:1大炒西班牙。
荷蘭在2014年世界盃B組首場分組賽，就遇上衛冕的西班牙，上演之前一屆決賽翻版，但是賽果今次絕非「翻版」。狂牛先由沙比阿朗素操刀射入12碼領先，不過荷蘭完半場前扳平，功臣就是變身「飛將軍」的雲佩斯（Robin Van Persie），由他在禁區邊附近一頂入網，荷蘭扳平後全隊猶如上了電。
橙衣大軍在下半場繼續加強進攻，53分鐘，洛賓接應長傳扭過了碧基及沙治奧拉莫斯後起腳，皮球稍稍省到了沙治奧拉莫斯後改變方向，荷蘭反超前2:1。64分鐘，雲佩斯上前衝頂與門將卡斯拿斯相撞，伏兵遠柱的迪華積趁機頂成3:1。
西班牙曾經努力反撲，在67分鐘，大衛施華的入波被判越位；荷蘭之後繼續狂攻，72分鐘，雲佩斯乘著西班牙回傳犯錯射入空門，荷蘭領先4:1，全場球迷開始興奮地玩人浪。80分鐘，洛賓快放作個人突破後抽射入網，為荷蘭埋齋，大勝五個一皮。