【Now Sports】在逆境中做好本份、互助互勉,這些年所說的香港精神,莫過於此。效力冠忠南區的港腳陳肇鈞深盼大家繼續展示香港精神,盡快令大家熟悉、熱愛的香港回復舊觀,這,不就是你與我心中所想?
「我哋球隊依家全部練波都喺將軍澳,之前喺港會,但因為嗰度有會員確診,依家冇再去。將軍澳場下晝1點關閉,所以我哋全部練波都係11點至1點,同平時最大分別係交通唔方便,因為大部份球員住南區,不過依家慢慢習慣,喺疫情下係要遷就,唔係樣樣咁完美。
今次疫症最大體會正正係球圈人好團結,冇話唔方便而鬧交或者唔同意見;再講球會老闆好好,好鼓勵我哋一齊行出困境。球圈外,最緊要屋企人同身邊嘅人一齊好落力做好自己應做嘅嘢,好似少咗出街、唔好諗去旅行,先維護家園,呢個係優先考慮。
社會方面做得好好,當然我唔認同政府,好多嘢都做得唔好,譬如當初(疫症)爆發真係唔夠口罩,大家攞到幾多個就分畀身邊人、朋友,呢樣係香港人需要有嘅精神。唔好理政府點對我哋,我哋做好自己,互相影響其他人。政府做得唔好嘅,放低先,遲啲再同佢計數。
嚟緊目標好難答,今日都未知5月尾可唔可以完成球季,特別依家換咗主教練,鄭兆聰冇做,唯有踢好每一場波,見步行步,做好足球員本份。
香港人順境咗好多年,爆疫症冇人想,大家都係受害者,只好諗點樣一齊度過難關。依家香港人做得好好,身邊嘅人都跟足衛生指示,家居隔離妥當,做完嘢返屋企唔好留喺街度,希望大家keep住。香港比其他國家做得好,希望快啲回復應該有嘅香港。」
陳肇鈞(足球)
【編按:sports.now.com一連數天請來幾位本地體壇精英親述最新訓練狀況之餘,與港人互勉,一同集氣共度時艱。】
明日人物預告:
麥卓穎(滑浪風帆)
相關文章:
【港將抗疫集氣】王蘊妮:低處未算低
https://sports.now.com/home/other/details?id=28939445745
【港將抗疫集氣】周健宏:荒謬疫症一齊捱!
https://sports.now.com/home/other/details?id=28939445707
【港將抗疫集氣】呂麗瑤:為飲杯靚咖啡感恩
https://sports.now.com/home/other/details?id=28925719814