【Now Sports】喺運動場開放咗短短兩星期,依家又要同運動場say goodbye,上星期講咗一啲外出跑步要留意既嘢,今次會講吓喺冇運動場情況下,仲可以點跑。
撰文:劉德龍
地點同時間係兩大重點。先講時間,天氣開始唔涼,盡量唔好練「烈陽神功」。為咗減少影響到其他人,可以喺返工前或下午6點前跑。你可以想像下,早上8至9點返工時間有好多人行嚟行去,佢哋見到你冇帶口罩跑來跑去其實都幾驚。另外,夜跑7至9點係返工人士跑步嘅黃金時間,所以要避。當然weekend更多人,更加要避。
對於返工人士嚟講,早啲起身跑完步,沖個涼食個早餐再返工就very good,可能你會講咁早起唔到身喎,咁樣樣……可能要試吓喺屋企跑,用返你平時嘅心跳錶,開跑步機嘅mode就會計到距離。
地點係一個重要既因素,無咗運動場仲可以有咩choice呢?早幾年好興街跑,喺鬧市中穿插,依家唔好咁做,因為你會為其他人製造不安,同時你感染既風險亦會高咗。亦唔好去一啲出名嘅路線,你見到weekend行山熱點就會知道有幾危險。
講到咁,有冇咩建議先?啟德、科學園、金督馳馬徑同大美督水壩都係唔錯嘅選擇。佢哋有幾個共通點,附近唔多居民散步,交通唔方便同冇地方做bag drop。以上共通嘅優點就係weekday唔多人,weekend嘅話不如留喺屋企做其他運動(下集再講)。
如果你去跑嘅話,最方便就係揸車。冇車點bag drop呢?答案就係唔好bag drop……what!Make it simple,搵條有褲袋跑褲或者好細嘅跑步腰包,袋電話+cash+百達通+身份證+口罩袋,其他嘢就唔好袋。跑完就返屋企,做一陣鹹魚,返到屋企先沖涼。
上述嘅路線可以跑interval or fartlek or tempo or long run。有啲路線就真心唔建議,例如馬鞍山海濱或者中西區海濱長廊,因為多人散步同埋高風險。大家可以先去睇睇邊度多隔離人士嘅大廈,再研究吓咩路線比較安全。
咁麻煩呀……冇錯都真係幾麻煩,所以要搵其他嘢去取代,下集再講有咩好做。
撰文:劉德龍
(鐘意跑步但唔叻)
Q:Actually……who are you?
Ans:Google me
【編按:全體抗疫,作為體育人更要積極面對疫情,本欄找來本地運動專家與現役運動員,為大家分享疫情下做運動的心得。逢周一及周四上載】
星期一 劉嘉豪
星期四 劉德龍