【Now Sports-體育】每當提到香港花劍美男，大家都會數到張家朗、張小倫或已退役的崔浩然，蔡俊彥這個名字彷彿被忽略了。不過自從Ryan轉打全職後，成績有目共睹，這名與張家朗同期的劍手，目標不止要讓人認識他的名字，更希望做一個10年後仍為人津津樂道的頂尖劍手。
採訪：肉面飛龍
蔡俊彥（Ryan）與張家朗同樣是22歲，自小就一起打比賽。不過張家朗一早全職投入打劍，成名比較早，蔡俊彥就選擇先以學業為重。2人屬於同期劍手，Ryan表示難免自小就有比較，細個時可能計較一點，不過長大後學會看遠些，因為世界上還有很多很強的對手。
「你話會唔會想超越佢（張家朗），想，但佢唔係唯一我想超越嘅人，想超越嘅人仲有好多。」說到尾他不止想做香港第1，而是希望名列前茅，甚至成為世界第1劍手。
有如此目標絕對不是誇下海口，而是有實際成績。去年5月在俄羅斯聖彼得堡站世界盃，Ryan與隊友奪得亞軍創下歷史；之後更於上海花劍大獎賽個人賽奪季，做出生涯最佳成績。
被問到覺得本身打法有何優勢，Ryan表示性格貪玩，用的方法比較另類，「我比較鍾意諗人哋做乜嘢先，然後再決定自己點做。好多人開始先諗自己嘅動作，冇諗過對手。」
Ryan曾經認為要迎合社會規範，一定要完成大學學位，但最終也將重點放在劍擊上，於2018年2月轉為全職運動員，減少上學時間。Ryan形容自己以前是一個比較「㒼塞」的人，很有原則，「覺得係咁就係咁」，而劍擊就間接塑造了他之後的性格變化。
「打劍有時好講求變化，你唔可能picture咗咁樣，就覺得永遠都係咁，如果你想贏就一定要好聰明、好靈活，所以開始嘗試接受更多嘅野，嘗試個腦開放小小接受新事物。」
這幾年Ryan的想法有很大變化，由將學位放首位，到全職打劍，甚至在去年為爭東京奧運入場券暫停學業，的確有很大反差。想起當初轉全職，也感到掙扎，幸得父母支持，他才可以任性一點做自己喜愛的事。
「而家仲有一個掙扎，就係可能停學後未必再讀書，可能一直喺打劍方面發展，用劍擊方向做基礎。」Ryan說，「自己鍾意做嘅事作為事業係一件好幸福嘅事，雖然唔知道經濟上面係咪穩定，但嗰種感覺唔係人人感受到，所以都覺得自己好幸運。既然呢樣嘢喺眼前，倒不如好好珍惜，努力做好佢。」
目前首要目標當然是奧運，談到長遠計劃，Ryan這樣說，「有一次同教練傾計，講起中國劍手嘅話題，我話呢一代中國劍手都幾勁；跟住教練話，呢個人係勁，但10年後冇人會再提起呢個人。跟住我就同自己講，我想做一個10年後仲有人討論嘅劍手。當然係好嘅方面，希望打得更好，好到一個位係人哋會記得你以前嘅光輝，好似我哋而家會討論啲好勁嘅人咁，希望生涯可以做到。希望遲啲每次出去打都有信心衝擊前4名，抱住贏到最後嘅心態！」
在剛過去的周日，香港男子花劍隊於巴黎站得第4未能站上頒獎台，不過就擊敗宿敵韓國，賽後奧運排名超越韓國進佔世界前4位，大有機會取得東奧資格。港隊下月21至23日將出戰世界盃埃及站，亦是最後一場團體奧運計分賽。
