【Now Sports-體育】曼聯憑後備上陣的美臣格連活下半場攻入扳平入球,主場與愛華頓打成1:1平手。
周日英超賽事,由曼聯主場對愛華頓。曼聯沿用上場2:1擊敗曼城的4-2-3-1陣式,前線由馬斯亞擔任,華舒福,丹尼爾占士和連加特支援進攻。至於繼續由鄧肯費格遜領軍的愛華頓,排出5-3-2陣式,力求穩守。
曼聯一開波即有黃金機會,費特傳球被愛華頓守衛解圍後,皮球落在連加特腳下,後者直接轉身埋門,皮球柱邊出界。10分鐘哈利麥佳亞一記長傳傳予左路的華舒福,後者殺入禁區勁射斜出,其後占士的埋門又無功而還。26分鐘「福仔」主射罰球勁度十足,但角度太正,被佐頓碧福特單手撲出。
愛華頓上半場有甸尼傷出,由拜恩斯入替,卻簡接迎來入球出現。37分鐘拜恩斯開出貼門角球,迪基亞出迎疑似被卡法路雲侵犯而未能解圍,皮球落在連迪洛夫身上彈入,愛華頓憑烏龍球領先1:0完上半場。
下半場一開波曼聯即主攻,但具威脅的埋門欠奉,哈利麥佳亞52分鐘未能接應費特的罰球,6分鐘後的頭槌埋門受壓下亦頂出界。61分鐘後上的梳爾帶波入禁區快射,佐頓碧福特瞓身撲出,占士補射又省中連加特。
曼聯其後換入美臣格連活加強攻力,69分鐘先有占士遠射被接實,其後連迪路夫把握角球攻勢轉身抽射,僅僅越楣高出。曼聯戰至78分鐘終扳平,占士左路帶橫至中路,傳予美臣格連活,後者一推射近柱得手,曼聯追成1:1。
那邊廂愛華頓被追平後未有放棄爭勝,84分鐘伊禾比禁區左路抽射,迪基亞飛身撲走,其後拜恩斯的罰球又無功而還。最終雙方打成1:1平手,各得1分。