【Now Sports-體育】周六德甲爆發國家打吡，拜仁慕尼黑主場憑利雲度夫斯基梅開二度，大勝多蒙特4:0。
拜仁慕尼黑由暫代教練芬克領軍，湯馬士梅拿正選披甲，跟拿比、高文、利雲度夫斯基（Robert Lewandowski）組成鋒線。多蒙特排出無鋒陣，馬里奧葛斯、托根夏沙特、山曹、祖利安白蘭治合作攻堅。
兩軍在安聯球場甫開賽便鬥攻，入球在17分鐘出現。右閘柏華傳中，利雲度夫斯基走靚位頂入，拜仁領先1:0；羅拔仔開季連續11場德甲建功，繼續延續紀錄。拜仁攻勢浪接浪，拿比於38分鐘射入空門，但因越位被判詐糊。
拜仁在下半場展開僅2分鐘便奠定勝局，湯馬士梅拿發揮速度在左路發難後傳中，雖然羅拔仔未能接應，但拿比撞入，擴大優勢至2球。76分鐘，湯馬士梅拿貢獻今場第2個助攻，利雲度夫斯基梅開二度，加上倒戈中堅侯姆斯擺烏龍，拜仁以4:0大炒多蒙特。