【now.com體育】講到荷甲球隊，大家都聽過阿積士、飛燕諾和PSV燕豪芬。佢哋可以話係荷蘭最成功及最受歡迎嘅球會。不過筆者卻鍾情於荷蘭北部菲仕蘭省嘅海倫芬。
撰文：Butch So
前荷蘭國家隊射手雲尼斯達萊及亨特拉爾均先後為海倫芬效力。「荷蘭三劍俠」之一嘅雲巴士頓更曾經執教過這支球隊。去年12月，筆者同一班海倫芬FEANFAN球迷雜誌嘅編輯和記者朋友，一同乘搭由FEANFAN安排嘅球迷巴士，去睇海倫芬作客NAC嘅比賽。
巴士上好多球迷以為我來自日本，專程去為小林祐希打氣。從荷蘭北部海倫芬南下NAC，車程需要兩個小時。球場作客區位於南看台右上方的一角，看台並設置圍板分隔主隊嘅球迷。由於容許球迷吸煙及飲酒，所以看台上煙霧瀰漫，煙味同啤酒嘅味道充斥整個鼻腔。
呢場係去年歇冬前最後一輪比賽。開波前NAC排聯賽第17位，海倫芬排第9位。海倫芬理應可全取3分。點知計漏咗球證擁有扭轉乾坤嘅能力，海倫芬在先失一球下閃電追平，到咗14分鐘連斯查中場一記攔截，球證睇完VAR後直接向佢出示紅牌驅逐離場。打少一人下嘅海倫芬靠米素爾雲貝根遠射反超前一球。臨完上半場，球證作出一個相當具爭議嘅判決。小林祐希一記攔截被球證直接出示紅牌驅逐離場，令到海倫芬只剩下9人應戰，形勢更為惡劣。到咗補時階段，布雷達嘅前鋒基奧雲尼哥迪蓄意踩中海倫芬門將華拿夏恩嘅小腿，但球證睇完VAR後只係出示黃牌警告。
成場波嘅轉折點係當下半場海倫芬領先2:1時，米高華納單刀被從後撞跌，但球證完全睇唔到。教練利基連克更與球証理論被逐離場。最終下半場連失3球下，慘敗2:4完場。
完場後乘搭巴士返海倫芬時，大家都拎住部電話睇緊荷蘭盃8強抽籤直播。點知抽到作客對阿積士嘅下下籤！到咗1月20日，荷甲歇冬後重開。海倫芬作客阿積士合演咗一場對攻戰，最終打成4:4平手，但四日後荷蘭盃再一次作客對阿積士，以1:3敗北8強止步。
今季球隊陣容比上季有不少變動，首先季初後防大將杜費斯轉投PSV，而皇馬借將馬田奧迪加特借用期滿就後去咗維迪斯。伊朗前鋒高查尼赫特同軒克維爾曼相繼離隊，於是從PSV借到年青高大前鋒森姆林馬斯，另外又從AZ阿爾克馬爾和維迪斯分別簽入連斯查和米素爾雲貝根。
由於財政緊絀，球隊唯有將今年夏天合約先到期嘅科索沃翼鋒艾巴辛尼利提早於冬季轉會窗重開時放走，所以向阿積士借用年青左翼丹尼士莊臣，而養傷缺陣達9個月嘅隊長舒赫斯終於可以復出。另外，中堅貝菲斯轉投韓國蔚山現代。
2018/19年球季嘅上半季，海倫芬表現確實令人失望，而歇冬後頭5場比賽只取得4和1負未嘗1勝，聯賽排名更跌至第15位。幸好上一輪聯賽反勝幸運薛達4:2取得重要3分，暫時以27分排在聯賽第11位。希望球隊在下半季表現有所改善，避免捲入降班漩渦。
撰文：Butch So
（我們都是這樣長大、都是這樣睇波的，本欄讓球迷發表睇波經歷與心聲，以及訪問足籃狂迷，不定期上載。各路英雄如欲與大家分享睇波故事或感受，不妨聯絡我們。）
email：ballthirteen@hotmail.com
歡迎瀏覽球十三fb專頁，若得到波友一個like，就是我們團隊的一大鼓舞：
www.facebook.com/ballthirteen
