葡萄牙門將列卡度赤手擋12碼。
(©AFP)
【now.com體育】最近同朋友食飯，剛好餐廳電視上播緊拜仁慕尼黑的賽事，正當守門員烏里治大腳開出龍門球之際，朋友認真地道出一個問題，「為甚麼他要戴著手套？」這個問題非常有趣，有趣之處是在於該名球員明明是個守門員，守門員戴著手套比賽問題何在。但其實守門員在比賽中是否必須配戴手套？答案原來非也。
撰文：盧永義
在現今足球世界，近乎所有守門員都會配戴手套，因為手套有絕對保護門將手指作用，而且手套上的膠乳質亦有助將球接實。不過在球例當中，就沒有說明守門員必須在比賽中配戴手套，即是話如果守門員喜歡的話，是可以赤手上陣，甚至戴一隻唔戴一隻。在2004歐洲國家盃8強賽事，就上演了空手接白刃一幕，當時英格蘭與葡萄牙戰至互射12碼階段，去到第7輪非生即死時刻，葡萄牙門將列卡度（Ricardo）突然除低手套，雙手「光脫脫」挑戰華素爾（Vassell）嘅操刀，唔知華素爾係咪嚇怕咗，真係射失12碼，結果列卡度帶領葡萄牙進入4強。
門將列卡度賽後就話，因為當時已經連續3球比人射入中間，感覺要做點甚麼去阻止對手繼續入球，於是除下手套，赤手擋出華素爾的12碼。其實有咁上下經驗球迷都知，每當射12碼時，對方門將許多時都會「整色整水」，基本嘅拍下條門楣，再唔係就指指點點「口噏噏」，就連喺對手面前跳part蛇舞都有。守門員之所以搞咁多嘢，無非都係想比啲壓力對手，希望佢射唔入啫。既然係咁，操刀球員不妨借鏡，試下射之前搞多啲「花臣」，比啲壓力對方龍門，而且增加場波嘅娛樂度。
離世界盃仲有69日！
本欄逢星期五上載
作者簡介：
盧永義（102），運動及數字愛好者，熱愛足球，為業餘專欄作家，冀以風趣生動方式分享體育之樂。
電郵：102talksport@gmail.com
