【十三短打】問德文答英文 杜曹先贏一仗

【Now Sports】杜曹能唔能夠帶領英格蘭贏世界盃？鬼知。只知一個簡單嘅記者會，就知佢好識撈。都未落場，就先贏一仗。

撰文：球十三

英格蘭新帥杜曹（Thomas Tuchel）啱啱出席記者會，據外電講佢好識做，第一句就推崇英格蘭足球，引入已故球王比利講過嘅「溫布萊係足球中心，足球大教堂」。畢竟教過車路士浸過英超水，一早識點同班英國記者佬周旋，得體恭維話自是不缺。佢笑住講自己揸德國passport，希望以行動說服到班英格蘭躉佢係有能力。

當被問到會唔會唱國歌，佢就答以前喺溫布萊感受過首歌有幾激昂，即係又提大家佢喺英格蘭有過嘅履歷，轉移咗視線，到最後至答未決定唱唔唱。單係呢一點，看守領隊卡斯利就望塵莫及。

係人都知佢風格同前帥修夫基唔同，肯定唔會「修」規「曹」隨，但至少都肯讚「南閘」，識尊重人。佢又話一直掛住英國，成日想返嚟，所以肯定會住喺英國。梗係啦，佢鄉里奇連士文之前因為唔肯住韓國招人口實，衰開個頭最終冇咗飯碗，前車可鑑嘛。

最正係當記者會上有人用德文提問，佢就即時用番英文答，咁識做，邊夠佢玩？

英足總CEO布寧咸話大約有10個聘用候選人，當然冇講仲有咩人，但從各方面睇，杜曹係個唔錯嘅選擇。

又想講下曼聯，一個星期前仲講緊杜曹可能成「魔」，唔夠一個星期佢就執掌英軍。講到尾，喺大賽有冇好成績，係年幾之後嘅事，邊似曼聯兵凶戰危，燙手山芋，唔夠幾個月就有危機。畀你係杜曹，都識揀啦。

撰文：球十三

足球迷叫第十二人，冇偏愛，冷眼旁觀係十三。