【A&M Diary】踏入宵夜時段就係肚餓。想食啲小食滿足一下空虛嘅心靈，串燒就啱晒啦！嚟到元朗嘅夜貓燒，餐廳主打港式串燒，即叫即燒當然係基本，但自家制嘅蒜蓉同醬汁夠曬惹味，明明諗住落嚟夜貓燒叫兩串就算，點知越嗌越多，邪惡但又非常滿足！
夜貓燒：脆皮爽肉鱔
夜貓燒嘅鱔肉燒得外脆內嫩，表面帶住微微焦香，入口先係脆卜卜嘅口感，跟住就係爽彈鮮嫩嘅鱔肉。鱔肉本身油脂豐富，燒香之後更加惹味，越食越滋味。
夜貓燒：肥牛蘆筍串
燒過嘅肥牛，肉汁同牛油香味蜂擁而出；而索晒肉汁，口感爽脆嘅蘆筍更為突出。
夜貓燒：蜜燒雞中翼
雞翼燒得香脆，外皮帶有甜甜哋嘅蜜糖香，雞肉依然保持軟嫩，一咬爆汁，所以話燒雞翼嘅最佳拍檔果然係蜜糖！
