【Viu】「大哥大」洪金寶、梁朝偉、許鞍華導演、「粵劇泰斗」阮兆輝同張德蘭老公楊偉誠今日喺《香港演藝學院榮譽博士暨榮譽院士頒授典禮 2024》上獲頒授「榮譽博士」，「梁太」劉嘉玲、「洪太」高麗虹、洪天明同太太周家蔚及兩個囝囝都專誠嚟撐場，兩個孫仔仲吻賀大哥大，超有愛呀！
對於喺兩星期內接連獲頒授兩個「榮譽博士」，偉仔一貫淡淡然回應，亦唔會大肆慶祝，但就預告將會同家人去日本滑雪度假，此前梗係要去捧嘉玲姐同子華神嘅舞台劇場先可以飛啦！偉仔坦言喺影壇仲有一個心願就係做監製，預計明年底就會開拍一套關於父女情嘅劇情動作片，除咗自己會親自演出，「阿女」一角就視乎拍攝地點係日本定韓國再搵當地演員喇！佢仲預告會參演日本著名導演是枝裕和嘅新片，但等咗成年都未見劇本，認真搞笑！
講到港產片最近狂破紀錄，偉仔都大讚《破．地獄》同《爸爸》好睇；大哥大就希望政府可以多加資助電影業，等自己可以早日一圓「最佳導演」夢咁話！
