【Now.com】剛剛暑假去完旅行嘅你，係咪已經plan緊下個旅程呢？過兩個禮拜就到中秋節，很快踏入2024年Q4，咁代表去日本睇紅葉季節又到，日本氣象株式會社公布今年紅葉同黃葉嘅最佳觀賞時間預測，方便大家夾好時間，mark定日子請假去旅行！
今次預測涵蓋咗由北海道到鹿兒島各大城市同全國約700個紅葉觀賞景點，仲有日本全國約2,700座山不同高度紅葉觀賞預測。下一輪預測預計喺10月上旬公布，小編將會為大家密切跟進更新，bookmark我哋Now.com WATCH，日日嚟睇下就唔會miss咗。
預測最佳觀賞日期根據氣象廳對受觀測樹木，大部分葉子嘅顏色變為紅色（或黃色）嘅第一日。日本氣象株式會社預測日本今年秋天嘅氣溫普遍偏高，東京嘅紅葉最佳觀賞期大約喺 12 月 1 日，大阪嘅最佳觀賞時間為 12 月 4 日左右，兩地都同與往年相若。不過，喺北海道札幌同長野等部分地區，預計最佳觀賞期將比往年遲 10 日以上，以札幌為例，紅葉最佳觀賞期預計係 11 月 8 日，比往年遲 11 日。
【北日本地區】
9月氣溫預計將明顯高於往年，10月到11月期間氣溫將維持較高水平。
紅葉最佳觀賞時間
預計將與往年持平或稍遲，山間地區嘅紅葉預計將喺10月上旬到11月中旬進入觀賞期，平原地區則預計喺10月中旬到11月下旬達到最佳觀賞期。
黃葉最佳觀賞期
預計與往年持平或稍遲，平原地區將喺11月上旬到11月下旬進入觀賞期。
【東日本地區】
9月氣溫預計將顯著高於常年，10月到11月期間氣溫仍將維持較高水平。
紅葉最佳觀賞期
預計與往年持平或稍遲，山間地區嘅紅葉預計將喺10月下旬到12月上旬進入觀賞期，平原地區則預計喺11月下旬到12月中旬達到最佳觀賞期。
黃葉最佳觀賞期
預計與往年持平或稍遲，平原地區將喺11月中旬到12月上旬進入觀賞期。
【西日本地區】
9月氣溫預計將顯著高於過往年份，10月到11月期間氣溫仍將維持較高水平。
紅葉最佳觀賞期
預計與往年持平或稍遲，山間地區嘅紅葉預計將喺11月上旬到12月上旬進入觀賞期，平原地區則預計喺11月下旬到12月中旬達到最佳觀賞期。
黃葉最佳觀賞期
預計與往年持平，平原地區將喺11月中旬到12月中旬進入觀賞期。
資料來源：日本氣象株式會社
