【Viu】Sammi鄭秀文紅館騷《You & Mi鄭秀文世界巡迴演唱會2023》，噚晚（16日）第四場嘉賓係Jace陳凱詠。二人合唱《煞科》，Jace同Sammi又唱又跳零怯場。第一次踏上紅館舞台嘅Jace嘆神奇：「好正呀！咁近距離感受Sammi嘅energy。因為之前一段時間唔係好容易過，但Sammi超好，私下同我講咗啲說話，令我覺得我真係要加油。」全場掌聲。然後Jace送上一個湯壺：「我本身諗住自己煲湯，但考慮Sammi健康，所以裏面係我寫嘅一張湯券，等你演唱會完成之後，可以隨時兌換我煲嘅湯。」So Sweet呀！Sammi搞笑話：「唔怪之得個壺輕飄飄啦！」等Sammi落台換衫，Jace再表演新歌《百妖夜行的修行》。
噚晚嚟捧場嘅藝人有老友小齊任賢齊、阿Sa蔡卓妍、導演莊文強等。而encore先係高潮，Sammi即興請觀眾席上嘅小齊合唱《浪花一朵朵》，佢仲笑小齊嘅廣東話程度係《老花一朵朵》，全場爆笑。合唱完小齊就話：「『麼麼茶』一路喺馬來西亞嘅熱浪島等Sammi返嚟，等唔到，我就嚟香港搵你！點知我一返嚟香港，個個叫我『秋哥』，因為《九龍城寨之圍城》！」Sammi興奮回敬：「恭喜你，過億票房！」小齊再表示：「你攞獎時，我仲開心過自己攞，好感動！」Sammi話：「終於攞到啦，yeah！有夢想唔好放棄，70歲都係攞獎時，你加油，演技再進步啲呀！」好睇呢！快啲入嚟睇片啦！
