【A&M Diary】今日去咗行難度比較高，位於屯門嘅青山，行咗成日山就會出現行山後遺症，就係非常肚餓喇！所以小編去到附近嘅山景商場醫肚搵食！估唔到商場入面都有一間高質日本餐廳：花火漁屋，餐廳標榜每日由日本漁市場新鮮飛機直送，一於獎勵一吓行完山嘅自己。
赤伊佐姬刺身
九州直送嘅赤伊佐姬，又名赤伊佐木，呢種魚嘅當造期為六月至九月。白身魚嘅魚味一定無赤身魚咁濃，但勝在甘甜，魚味齒頰留香。而且稍稍燒過嘅外皮帶出油份，令魚香更加突出。
牛舌芯+雞翼串燒
串燒嘅火候同調味控制都恰到好處，值得一讚嘅係牛舌芯嘅厚薄適中，軟腍彈牙，令小編忍唔住encore多一串。
角切魚生丼
丼飯嘅魚生足足有成六款，包括熟蝦、油甘魚、三文魚、八爪魚、三文魚籽、蟹籽，種類豐富，而且魚生嘅份量唔少，夠晒新鮮，性價比十足。
