【A&M Diary】你係一封信，我未就係郵差囉，呢個完全係出賣年齡系列呀！但更出賣年齡嘅事，就係以前未有咁多電子通訊設備嘅時候，仲記唔記得收到一封信嘅喜悅呀？收到寄件人親筆寫上嘅祝福同近況，真係好滿足呀！喺英國倫敦就有一座郵政博物館（The Postal Museum），記錄咗英國嘅郵政歷史。以為講到博物館同歷史，就一定好悶？邊個話㗎！郵政博物館（The Postal Museum）最大賣點係活化咗Mail Rail，大家可以乘坐火車，嚟一場時光之旅。
郵政博物館：Mail Rail
自從香港回歸之後，去殖化就由郵筒開始。以前香港皇冠嘜頭嘅紅色郵筒，所剩無幾，但喺英國當然隨處都係，原來仲有藍色添㗎！不過，我哋第一站就先坐郵政博物館（The Postal Museum）嘅Mail Rail。喺香港，甚至世界各地，郵差送信主要嘅交通工具都係單車或汽車，但1863年嘅倫敦市中心竟然係用無人駕駛列車送信。
當年倫敦已經係世界首屈一指嘅大城市，市內交通繁忙，人煙稠密，影響郵差送信嘅速度。所以就興建左呢條21.3米，全長10公里，貫穿倫敦市中心嘅無人駕駛列車，最高峰嘅時候每日運送超過數百萬封嘅信件，直至2003年先完成佢嘅歷史任務。經過活化成為博物館之後，大家有機會坐上呢架小火車，過程中仲有唔同嘅片段，讓大家用20分鐘重溫當日Mail Rail嘅輝煌歷史。
郵政博物館：五個展區
喺倫敦郵政博物館（The Postal Museum）入邊分為五個展區，離開Mail Rail之後，大家就可以透過互動遊戲了解呢條過百年歷史，有可能係全世界第一條嘅無人駕駛列車係點樣運作。其中仲可以喺模仿嘅列車車廂，嘗試列車運行中分發信件，非常好玩㗎！
倫敦郵政博物館（The Postal Museum）其餘四個展區，喺馬路嘅另一邊，大家記住唔好漏咗呀！另一邊嘅郵政博物館（The Postal Museum）放有高達6萬件郵政古董同郵票，當然唔少得世界上第第一枚郵票：黑便士（Black Penny），大家仲可以透過互動遊戲，設計屬於自己嘅郵票添！另外，喺郵政博物館（The Postal Museum）入面仲見到一個藍色嘅郵筒，原來呢個係代表空郵服務呀！
