荃灣新村街豬肉檔型男阿威最近喺網上爆紅，唔少街坊都讚佢有明星相之餘，待客親切有禮貌。阿威日前接受專訪，大方透露私生活，原來36歲嘅佢已經有太太同埋一對仔女，不過人夫身分無損阿威人氣，由粉絲開嘅Facebook群組「荃灣鮮肉威威應援團」越來越熱鬧，成員突破1.2萬人！
阿威近日引來眾多女士合照打卡，傳媒相繼追訪，有淘寶賣家甚至推出「荃灣豬肉檔AK阿威」人型攬枕，足見阿威幾受歡迎。至於有過萬成員嘅「荃灣鮮肉威威應援團」就自創咗粉絲名「威威豬」，群組管理員仲整咗一系列阿威WhatsApp Sticker畀大家下載使用。
Photo／荃灣鮮肉威威應援團
Photo／荃灣鮮肉威威應援團
近年MIRROR成員生日，「鏡粉」都會用心搞生日應援，「威威豬」發現阿威生日係6月8日後，紛紛討論點為佢慶祝，有人提議「慈善應援」以群組名義捐錢，或以阿威名義捐豬肉畀荃灣兩餸飯店，等店舖可低價或免費派飯畀基層街坊。亦有粉絲表示想集資登巴士或電車慶生廣告，網民更幫手整埋預想圖，唔知到時會唔會落實計劃呢？
Photo／荃灣鮮肉威威應援團
Photo／荃灣鮮肉威威應援團
Photo／荃灣鮮肉威威應援團
