人氣男團MIRROR之前宣布開演唱會，都預咗今次一定難買飛，加上主辦方仍然行唔到實名制，除咗海量鏡粉仲有一大班炒家撲飛。今日開始指定信用卡優先賣飛，被怒轟安排差，唔少人都話已有Cut卡念頭。
Photo / Facebook@mirror.weare
MIRROR將於7月喺紅館開騷，雖然今次鏡仔踩足十場，但門票仍然供不應求。今日開放指定信用卡優先賣飛，大批鏡粉瘋狂F5刷新頁面，可惜買飛過程困難重重，唔少人用上電話、平板加電腦都係失敗告終，並已經籌備緊下次Mox優先賣飛嘅時候點樣再搶飛。
Photo / Facebook@emi an
Photo / Facebook@jimmy ng
Photo / Facebook@alex tang
今次指定信用卡嘅銀行都大收負評，因為優先賣飛安排倉促，申請完信用卡根本等唔切佢批，有人就係張卡批咗，可惜寄唔切未收到卡。大批鏡粉因為優先賣飛去申請，但遲遲未有回覆，打極銀行熱線都無人接聽，怒轟銀行安排差，「電話打唔通，完全潛晒水，發生咩事？」「其實優先賣飛係咪趕到咁呀，得1日時間準備！」更有網友指買唔到飛已經準備Cut卡，「會唔會破完一日內最多人申請信用卡嘅記（紀）錄之後，再破一日內最多人cut卡嘅記（紀）錄？」
