【A&M Diary】迪士尼動畫一直深受大小朋友嘅喜愛，而近年彼思嘅電影，無論係「靈魂奇遇記」、「玩轉極樂園」定「玩轉腦朋友」都充滿深度，發人深省，唔少動畫主角都深受大家喜愛。但如果想更了解彼思動畫製作嘅幕後過程，可以嚟到尖沙咀科學館期間限定嘅專題展覽：彼思動畫的科學秘密。展覽除咗讓大家了解科學與動畫之間嘅關連之外，場內亦有唔少打卡位，絕對係老少咸宜嘅展覽。
提提你
1. 每節嘅參觀人數只限300人，大家參觀之前，記住提前網上預約
2. 預約系統於每日早上 7 時更新，如果預約星期六日等假期日子，就記住較定鬧鐘，揀選合適嘅時間
彼思動畫
彼思動畫製作室（PIXAR）由1995年推出《反斗奇兵》之後，每年都有作品上映，而近期上畫嘅就係《盛夏友晴天》。彼思嘅動畫無論票房同口碑都唔錯，但一個個栩栩如生嘅動畫人物，故事場景又係點製成呢？
彼思動畫的科學秘密
展覽由波士頓科學博物館與彼思動畫製作室共同策劃製作，分為八個區域，展出 50 多組互動展品、實物模型同錄像節目，讓大家可以體驗製作流程中每個幕後程序。
展覽先由彼思員工簡介動畫製作嘅 8 大流程：建構模型、建立骨架結構、建構表面、佈景與攝影、角色動作製作、模擬、燈光及成像製作。原來喺1995 年製作嘅「反斗奇兵」，除咗係全球首部全電腦動畫製作嘅電影之外，喺最擠擁嘅畫面更出現咗 21,633 個角色嘅紀錄。但原來所有複雜嘅事物，都係由多個簡單形狀組合而成。
建構模型
當美術師描繪角色之後，就會以草圖同泥塑製作一個 3D 模型；然後數碼建模師會為角色建構虛擬3D模型，而令角色逼真嘅秘訣，就係無論鏡頭遠或近，都要將角色外表整到平滑。例如「怪獸公司」嘅毛毛，就由500 幾個變形器，以數式運算唔同表情及情感。
燈光製作
另外一個令到我哋讚嘆嘅就係燈光製作，喺動畫入面，除咗角色嘅細節描繪及場景嘅細緻，原來燈光效果同樣重要，例如角色嘅倒影、日落嘅顏色轉變，同樣能夠感受到動畫製作幾認真。係燈光製作嘅展區，就可以了解如何透過電腦將燈光效果呈現。
館內亦設有多個角色打卡熱點，例如《反斗奇兵》、《海底奇兵》、《怪獸公司》等場景，可以同迪士尼及彼思動畫製作嘅動畫人物盡情打卡啦！
