【now.com娛樂】到底大家對Eason的歌聲有幾渴，一個推銷全新國語專輯的迷你演唱會，在旺角麥花臣開，沒太多花臣，就是10首全新國語，$750門票連CD，兩晚共4000個座位，10分鐘掃清！其實算慢喇，可能售票點較少，換做城市電腦售票網，3分鐘內，保證！如果阿姐手腳快，1分鐘都仲得。
這是個很神奇的現象，搶購陳奕迅演唱會飛當然是合理不過，但今次並非平時的演唱會，沒有〈浮誇〉，亦不會有〈幸福摩天輪〉、〈單車〉之類，講明是只唱新歌，還要是新國語碟歌曲，都可以賣爆，即是大家很喜歡陳奕迅的國語新歌啦？又不是喎，最近派台的〈誰來剪月亮〉，反應一般，想問有誰聽過。Eason近年的國語專輯，在香港都反應一般，他本人曾透露某張國語碟，更只賣得幾百，一個好可怕的數字。但因為配一個演唱會，就10分鐘賣斷市，其實是買飛送CD，CD回到家還要搵個CD Rom播，今時今日要搵個CD Rom，其實仲難過買到呢張飛。
或許會有人期待，可能唱完十首國語歌，會Encore兩首廣東歌呢，即是用些少錢買個希望，等一個不知會否來到的安慰獎，又即是800蚊買張9個字的六合彩，只望中廿蚊一樣，非常務實。就當真係會唱兩首廣東歌，$750搏兩首都心甘命抵，難怪正式演唱會時門票可達天價。
說到底，這不是演唱會，對粉絲來說是見面會。試問陳奕迅有幾耐冇在香港有表演過，既沒有演唱會，又沒有頒獎禮，他更加謝絕香港電視的演出，想聽他唱歌，唯一機會變成每個星期上網追看《中國新歌聲》，不單止會唱兩句，又會同周杰倫合唱，又會唱走音版娛賓，多姿多彩睇得開心。不過再好睇都係隔住個Mon，之所以親身欣賞的機會是幾難能可貴。其實樂迷們掛住陳奕迅的不止是歌聲，還有他的臉容、他的身形、他的舉止、他的吹神式棟篤笑，甚麼都想看，但已沒渠道滿足到，唯有去搶購。你看大家有多愛陳奕迅，確實愛得單純忠誠美麗。
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
