【now.com】今朝一大早，連登討論區嘅熱門就出現咗「個鬼佬紋咗劉慧卿個名上隻手到（圖）」，小編以為又係巴打啲整蠱post，點知撳入去，真有其事！仲有圖有片有真相！究竟卿姐同呢位痴情洋漢係咪真係有新戀情，遲來嘅春天係咪堅？！
卿姐第一時間已經澄清唔識呢位大隻佬，一切只係一個美麗嘅誤會，巴打「我叫Mata」就懷疑係Google Translate惹嘅禍，呢位洋漢嘅女朋友可能又係叫Emily Lau，紋身嘅時候又無check清楚，所以先將本來嘅浪漫事，變成一單笑料啫。小編就試過，喺Google Translate單單輸入Emily，在翻譯建議嘅第四個已經係劉慧卿，可以想像卿姐地位絕對唔簡單。好多傳媒已經搵卿姐講回應，有報道引述話佢「唔識呢個洋漢」，仲好霸氣咁話「老實講，我哋呢啲，乜都見過啦，哈哈哈....」，所以睇到張相時嘅反應係「定過抬炸彈」。
巴打們而家仲人肉搜尋緊個鬼佬出嚟，希望可以話畀佢知，呢個愛的紋身嘅「真諦」，有網民話：「如果我係個鬼佬，知道自己咁傻豬，真係斬咗自己隻手好過」。小編就覺得，又無咁嚴重，話晒卿姐後生都幾gfable，你睇佢以前「吊帶裙，報新聞」，不知幾正，大家真係唔識貨！
