【now.com娛樂】電腦病毒WannaCry肆虐，相信好多人都嚇到即刻更新咗Windows。發展成為一個全球災難，一齊被一個軟件勒索，對住一堆同死咗冇分別嘅資料，呢幾千蚊，你畀唔畀？
背後仲有個故事，本來WannaCry災情係更加嚴重，但有個22歲外國工程師，機緣巧合下發現病毒內含一個煞停系統。唔知點解會有咁嘅機制，可能以防自己突然良心發現？或者怕害到人家破人亡會後悔？唔知原因，但個操作係，病毒會搵一個不知名網站，該網站係未註冊嘅，當搵唔到個網站就會執行勒索程序。咁既然網站未註冊，即是一定會執行啦！於是年輕工程師就用少少錢註冊咗呢個網站，停止咗病毒繼續擴散。嗰種戲劇性，相信好快會有人拍成電影。人物立體，起承轉合齊備，?家隻病毒仲話會變種，連心理戰元素都有埋。呢套戲，我就真係Wanna watch喇！
如果真係有人將WannaCry拍成電影，我希望當中會有個命題，就係人嘅回憶，值得用幾多錢贖返？我經歷過Analog時代，影相有實物在手，係冇咁方便，亦紀錄唔到咁多嘢，始終菲林要錢唔可以乜都影，影夠36張又要換過筒，又唔可以Preview張相，又唔可以影影吓相變拍片，但有實物個人係踏實啲。唔係想比較Digital同Analog，而係當年我哋一齊隨住時代洪流，走入Digital時代，其實好似未完全準備好。唔係講緊個科技未準備好，而係使用者由始至終都只係識用，但點樣保存呢？似乎未認真思考過。
你話唔係喎，我有Backup喎，Harddisk一份，Cloud又一份，加埋手機，同一張相放三個地方都唔安全？係啊，真係唔算安全，唔安全在呢啲嘢全部都唔係永恆。手機會壞，唔使講啦，Harddisk我都死過幾隻，有次差啲救唔返，裡面刮花咗，要去到嗰啲電腦維修中心請專人搞。當時個心十五十六，又話冇定價，又話唔一定救得晒，我心諗，其實你話要幾多錢我都會照畀，因為好多重要嘢就在個盒仔咁細嘅Harddisk裡面，包括我同老婆嘅拍拖回憶同埋個仔出世片段，要點用錢去衡量？結果整咗三千幾蚊，同WannaCry勒索個收費差唔多，我笑住畀，所以我估自己中招的話，應該都會係破財擋災嗰類人。
呢次事件之後我買多個Harddisk，Backup多一份，但心裡面始終唔踏實。咁Cloud嗰份呢？我真心唔相信Cloud，因為都經歷過早期一啲放相網站結業。你話Google、Apple係咪好穩陣？?家係，但將來我唔敢講，當年Yahoo仲勁啦，十幾年後又咪係被收購！Server會唔會被攻擊呢？會唔會壞呢？當然希望佢唔會，但有一日真係咁的話，我電話上所有聯絡、相片、日記全部冇晒，Server都冇埋的話，我都只能接受，有乜辦法呢？?家個情況係，收集回憶容易，保存回憶困難，你嘅回憶，值得你對佢幾重視？
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
