【A&M Diary】九龍城係香港嘅小泰國，嚟到九龍城就梗係食泰國菜啦！九龍城泰國菜嘅選擇雖然多，但嚟嚟去去好似都係嗰幾間，終於等到一間全新登場嘅新派泰菜餐廳：少爺。少爺同樣由泰國人主理，味道正宗但餐牌選擇令人有眼前一亮嘅感覺，加上新裝修嘅環境，坐得舒服又食得滋味，絕對係有驚喜嘅九龍城泰國菜。
少爺：札肉沙律
沙律菜配上大量薄荷葉同西芹，用重口味嘅蔬菜刻意營造清新但刺激嘅味道，正好喚醒味蕾！有別於傳統嘅泰國餐廳選用青木瓜或柚子，少爺用上札肉，令沙律帶有肉嘅油香，令味道更為豐富。
札肉沙律
少爺：泰式船麵
船麵嘅湯底可以試出餐廳嘅底蘊！少爺嘅牛肉用上牛腩部位，肉質軟腍，肉味香醇；豬肉丸彈牙爆汁。重點係湯底非常鮮甜，湯水呈深褐色，湯質更顯濃稠醇滑，層次更香濃。而金邊粉輕易掛上湯汁，非常入味。
泰式船麵
少爺：豉油乾炒河
少爺用上較為大塊嘅寛河粉乾炒，充滿鑊氣之餘，仲相對容易吸汁，口感煙煙韌韌，加上炒蛋底嘅加持，呢個河粉係充滿誠意！至於配料用上厚度適中，肉質軟腍嘅豬頸肉，略帶油脂令河粉更添肉嘅油香。
豉油乾炒河
