【A&M Diary】喺中環呢個地段都可以搵到又平又抵食嘅南洋菜？一向走街坊親民價錢嘅兩草，必食嘅當然係肉骨茶等嘅南洋名物啦！踏入中環分店見到掛滿懷舊嘅霓虹燈牌，點解餐廳嘅佈置會充滿香港特色呢？原來兩草中環分店由西貢米芝蓮海鮮酒家大廚坐鎮，餐牌更有唔少特色小菜，選擇更多元化。
兩草：小籠包胡椒湯
一份四粒，每粒大概一口大小嘅小籠包，浸泡喺胡椒湯入面，未食已經聞到陣陣胡椒微辛嘅香味。每一粒都由表面嘅濃厚胡椒味，再湧出小籠包湯汁，慢慢又再湧出胡椒湯嘅味道，充滿層次之餘，暖胃又醒胃。
兩草：胡椒肉骨茶
兩草嘅肉骨茶走新加坡風格，茶色相對地較淺，但因為加入咗大量胡椒，令胡椒香味更為強烈，更香更有層次。豬肉用上排骨部位，油香肉香兼備，更加添肉骨嘅鮮甜。
兩草：香煎脆邊蛋肉餅飯
兩草嘅另一名物就係香煎脆邊蛋肉餅飯。肉餅煎得好香，肥瘦適中，所以食嘅時候仲非常Juicy；至於舖係飯面嘅係燶邊太陽蛋，脆口嘅燶邊真係非常驚喜，食嘅時候可以將蛋黃汁撈勻落飯一齊食，加埋海量嘅香蔥粒，增添飯底嘅蛋香同蔥香，更為滋味。
