【A&M Diary】講起食日本料理，除咗追求魚生夠新鮮之外，更可以隨住季節品嚐唔同嘅時令食材！嚟到位於元朗嘅職人壽司，就遇上秋刀魚最當造嘅季節，職人壽司特意選用北海道時令秋刀魚，以刺身原條上桌，厚身又油脂豐富，完全係屬於秋天嘅限定美味！除咗秋刀魚之外，職人壽司都有多款魚生丼飯，估唔到喺小店都食到油甘魚、蜜柑鯛、魴鮄魚等高質嘅刺身，絕對唔係普通食一碗魚生丼飯咁簡單！
職人壽司：原條秋刀魚刺身
職人壽司特意選用嚟自北海道嘅時令魚獲：秋刀魚。呢啲季節食秋刀魚就最適合，除咗油脂豐富之外，原條嘅秋刀魚仲非常厚身，肉質特別鮮甜。食嘅時候，可以配上職人壽司調製，混入咗薑蓉嘅酸汁，更秒速為秋刀魚帶嚟鮮甜嘅味道。
原條秋刀魚刺身
職人壽司：職人魚生丼
職人壽司嘅每款丼飯都會配搭湯品、漬物、茶碗蒸同水果等，加上一份壽司，簡直就係份量十足嘅定食。至於職人魚生丼可以話係職人壽司嘅皇牌，所有魚生都非常新鮮，刺身切得夠厚身，非常鮮甜又不失口感。
左口魚壽司經火炙後將魚油迫出，入口即溶嘅口感，係叫醒味蕾嘅不俗之選！
火炙左口魚壽司
職人魚生丼嘅海鮮配搭都花咗心思：油甘魚白滑亮麗，入口味道鮮甜爽口，油香豐富；特選嘅時令鮮魚則有蜜柑鯛同魴鮄魚：蜜柑鯛用上蜜柑餵飼，魚肉已經自帶陣陣柑香，配上嫩滑嘅質感，肉質細緻；魴鮄魚嘅魚味相對較濃，魚肉質地結實，淡淡然嘅甜味係嘴嚼嘅過程慢慢滲出。最後，三文魚係呢個職人魚生丼唯一非白身魚嘅選擇，厚身又肥美，味道非常濃厚。
職人魚生丼
