【A&M Diary】西環好多隱世美食，今次就俾呢間泰國菜深深吸引！Thai Ros Zab係一間近期人氣高企嘅西環泰國菜餐廳，由泰國人主理，將泰菜嘅香料同手法，以濃郁同惹味醬汁呈現，掃走近排嘅悶氣。必食嘅金不換系列充滿層次，你又知唔知金不換其實係啲咩呢？
Thai Ros Zab：泰式豬頸肉沙律
前菜嘅泰式豬頸肉沙律已經唔簡單！主廚將豬頸肉煎得焦脆，肉味香濃，加上泰式酸辣醬汁，感覺清新，繼而變得辛辣，層次非常豐富，越食越開胃。
泰式豬頸肉沙律
Thai Ros Zab：金不換炒肉碎茄子
每枱嚟到Thai Ros Zab都會叫金不換，其實金不換即係泰國羅勒。呢道菜嘅肉碎同茄子爆炒後，鑊氣十足，加上金不換後，香味會更加突出，再帶有一份微辛香氣，令肉類菜式更加惹味，真係好想加多碗泰國絲苗白飯。
金不換炒肉碎茄子
Thai Ros Zab：蒜蓉胡椒鮮魷
惹味嘅餸菜除咗金不換之外，仲有Thai Ros Zab嘅蒜蓉胡椒鮮魷！外層鋪滿香口嘅胡椒同埋脆脆嘅蒜蓉；鮮魷用上薄薄嘅生粉炸過，非常鬆脆，而鮮魷則新鮮彈牙，口感豐富之餘，同樣非常惹味啊！
蒜蓉胡椒鮮魷
