【A&M Diary】世界盃啱啱踢完，各個聯賽又開鑼喇！睇波食宵夜直落，絕對係波友們最經典嘅浪漫！嚟到元朗嘅新榮來打冷食宵夜，唔少得嘅除咗滷水，仲有入波一齊大嗌、射失一齊揼春嘅澎湃，而呢種爽快感，先稱得上係睇波嘅氣氛！
新榮來：滷水鵝片雜拼
打冷又點少得滷水呢！新榮來嘅滷水雜拼有齊墨魚、紅腸、豬腩肉、鵝腎、豬頭肉之外，仲有處理比較花時間，近年少見嘅鵝肝同鵝粉腸呢！滷水汁夠晒香濃入味，而鵝肝非常順滑，鵝香豐腴、鵝粉腸外皮爽脆，咬落就粉粉地非常軟糯、鵝片油香豐富，肉質嫩滑。
滷水鵝片雜拼
新榮來：薑蔥枝竹炆滑雞煲
滑雞煲一上枱已經香味四溢，奪人食慾！煲裏面有大量薑、蔥、蒜頭，令到滑雞煲嘅底味非常豐富，層次就係喺呢度散出；新榮來嘅雞件有預先走油，所以肉汁豐富，肉嫩皮香；至於枝竹將煲內嘅香料同雞件鮮味盡收其中，令人食唔停口！
薑蔥枝竹炆滑雞煲
