【Now.com】邊個話F1淨係睇車？最近喺F1邁阿密站，一眾男士嘅眼球就被一部「人肉超跑」極速吸走！講緊嘅就係有「世界盃最性感球迷」之稱嘅克羅地亞索女Ivana Knoll。今次佢殺入F1車隊維修站，搞到連做緊直播嘅專業Camman都「定力失守」，畫面被Ivana Knoll吸住偏離航道，差啲搞出直播事故。唔知Camman有無畀老細照肺？！
事緣英國《天空體育》（Sky Sports）當時做緊賽後分析直播，請嚟前世界冠軍畢頓（Jenson Button）同幾位主持正正經經講緊車。點知講講吓，做緊直播嘅Camman大哥部攝影機好似裝咗「自動追蹤系統」咁，鏡頭無視幾位評述員，直接移向啱啱路過、超火辣性感嘅 Ivana！直播緊都咁樣，Camman真係身體最誠實。
除咗Camman，連旁邊麥拿侖車隊維修員都被捕捉到睇到眼定定、魂魄唔齊咁樣。外媒專欄作家都忍唔住抵死咁話：「好彩個維修員當時冇揸住電鑽，如果唔係分分鐘幫架戰車免費打多幾個窿！」
現年 33 歲嘅 Ivana Knoll 靠住火辣身材，喺世界盃一戰成名並贏得「最性感球迷」稱號之後，去到邊都成為流量密碼。今次佢喺充滿士巴拿、車軚同汽油味嘅 F1，成功化身賽道外「最強人肉跑車」。
Photo / IG@knolldoll
