【A&M Diary】近期非常熱鬧嘅啟德，除咗演唱會同大型活動之外，原來仲可以搵到一間好chill，與毛孩共同享受嘅餐廳：三月見。三月見以充滿質感嘅裝潢，加上創意料理，氛圍足以令你與愛寵享受瞬間放鬆嘅時刻。
三月見：豬頸肉辣汁元祿冷麵
唔知大家仲記唔記得元祿冷麵呢個名菜呢？三月見就神還原呢道名物，以酸酸辣辣嘅是拉差辣醬、沙律醬等多款醬汁，秘製成呢道名菜嘅靈魂醬汁，加上半肥瘦嘅豬頸肉，真係又邪惡又好味！便當仲配有椰菜沙律、玉子燒，非常豐富。
豬頸肉辣汁元祿冷麵
三月見：明太子珍珠貝忌廉意大利粉
珍珠貝雖然細細粒，但估唔到口感爽口彈牙，同意大利粉一樣咁有Al denta！濃郁鮮鹹味而帶有微辣嘅明太子同Creamy嘅忌廉一拍即合。
明太子珍珠貝忌廉意大利粉
三月見：韓國柚子蜜、冷泡果茶
三月見作為一間Cafe，飲品嘅選擇非常多，兼且造型精緻，啱晒大家打卡！其中韓國柚子蜜潤喉清甜、冷泡茶味道略帶微酸，極具層次。
韓國柚子蜜、冷泡果茶
