【Now.com】 馬路如虎口，泥頭車更隨時變「公路炸彈」。網上流傳一段驚險車Cam片段，一輛泥頭車在行駛途中懷疑因未有鎖好尾板，在上斜時突然「嘔」出大量泥土沙石，尾隨一架電單車閃避不及，慘遭「波及」導致跣胎倒地。影片曝光後引發網民一面倒怒轟，直斥泥頭車司機罔顧道路安全，「簡直係謀殺」。
網上流傳的車Cam片段顯示，事發於今 (15日) 早9時許，一輛泥頭車正沿馬路上斜行駛，當駛至斜路中段彎位時，車斗尾板懷疑未能承受泥土重量或未有鎖緊，突然鬆開。大量沙石如洪水般傾瀉而出，鋪滿整條行車線。
放大再看：
鐵騎士無辜中招 人仰馬翻險象環生
當時尾隨的一架電單車「食到應」，鐵騎士未能及時閃避。電單車車轆駛過泥石時隨即失控跣低，場面觸目驚心。幸好當時後方未有其他車輛高速駛到，否則後果不堪設想。
片段在社交平台廣傳，引發大批網民熱議，不少網民狠批泥頭車司機責無旁貸，未有確保貨物穩固便行駛。直斥：「咁樣揸車同謀殺有咩分別？」、「想害死人咩！」、「泥頭車佬真係公路炸彈，累人累物」。亦有駕駛者指出，類似情況在香港路面屢見不鮮，呼籲當局應加強執法，嚴懲涉事司機及承建商，保障其他道路使用者的安全。
Photo / 網上片段截圖
