【A&M Diary】鰂魚涌office多，為咗滿足區內嘅上班一族，呢區都有唔少餐廳，仲有唔少係極具特色嘅選擇。其中越之廚正宗越式餐廳由越南大廚主理，以北越風主打，其河內風味嘅越南粉以清澈、淺色，但味道濃郁芳香嘅湯底而聞名，注重牛肉嘅純正鮮美和香料溫厚，成為餐廳嘅名物！
越之廚小食拼盤
拼盤精選4款越南小食，包括牛油雞翼、扎肉、蒸粉包和鮮蝦墨魚餅。當中嘅越南春卷餡料十分足料，而且餡料都切得非常精細，令內外口感更鬆脆；鮮蝦墨魚餅非常彈牙，鹹香味道非常惹味。
安格斯牛小排湯河
湯底用上桂皮、八角、鮮薑等多種材料長時間熬製，顏色清澈，但味道出奇地多層次。牛肉用上美國嘅安格斯牛小排做主角，牛肉味比一般牛肉更濃郁，肉質又夠晒嫩滑。
海鮮蟹膏檳榔葉豬肉卷湯檬
用上香港越菜比較少見嘅檳榔葉作為豬肉卷嘅卷皮，檳榔葉非常清新，更帶出海鮮蟹膏嘅鮮甜味。湯頭同樣講究，用上蝦、蟹同埋雞肉長時間熬煮，並加入蕃茄為湯頭添上微酸嘅味道，零舍開胃，更令檬粉完美地掛湯。
