【A&M Diary】韓國鍋物可以話係韓國家庭每餐必備嘅菜式，泡菜湯、大醬湯、海鮮湯等，但無論咩湯鍋，入面嘅配料都唔少得豆腐。索晒湯汁嘅豆腐，好味之餘，營養價值仲非常高。不過，豆腐喺韓國鍋物中一向只係擔任配角嘅角色，直到登陸中環嘅八八嫩豆腐鍋，豆腐終於成為主角，濃郁嘅豆腐香味，嫩滑即化，非常驚喜。
海鮮嫩豆腐鍋
主角之一嘅豆腐鍋熱辣辣上枱，豆腐口感滑嫩，豆味濃郁，再搭配鮮蝦、蟹、蜆等足料海鮮，鮮甜味美，加埋生雞蛋，完美！
泥蚶拌飯
泥蚶類似蜆肉，味道鮮甜，口感彈牙，飯粒拌上鮮甜醬汁，每一啖都品嚐到濃濃嘅鮮味海味，再用韓式紫菜包住一齊食，味道更有層次。
辣炒魷魚
魷魚Q彈，大火快炒，鍋氣十足，每一件掛滿韓式甜辣醬，辣中帶甜、口感豐富。
豬肉菜煎餃子
手工煎餃外皮薄身，底部煎到金黃酥脆，豬肉同蔬菜餡，肉香十足，搭配韓式醬汁，口感層次分明。
紅石榴冰沙 + 芒果Mojito
食辣嘢最啱飲冰凍飲品，解辣一流。紅石榴冰沙酸甜清爽，入口即化，完美解辣降溫。芒果Mojito用芒果混搭薄荷葉與梳打水，果香濃郁，酸甜中帶點氣泡刺激。
