【A&M Diary】唔知你哋有冇發現，香港早餐嘅選擇其實非常多元化呢？話說前排去咗歐洲旅行一個月，每朝早餐嘅分別只係呢款麵包同嗰款麵包。至於香港嘅早餐，除咗茶記早餐、早茶點心，仲有幸福感十足嘅港式粥店。位於北角嘅大師傅粥品，晨早就提供軟綿鮮甜嘅生滾粥、即熟粥、腸粉同小食，成為我哋嘅暖胃之選。
炸兩腸粉
油炸鬼係餐廳嘅新鮮自家製，所以非常酥脆，而外面包住嫩滑嘅腸粉，一軟一脆，再配埋貼豉油、花生醬、甜醬同芝麻，口感豐富。
叉燒腸粉
腸粉非常香滑，叉燒鹹中帶甜，配埋甜豉油，非常滿足！
鹹肉糭
食粥唔夠飽肚，如果加埋鹹肉糭就啱啱好！糯米帶有淡淡嘅竹葉清香，餡料包括五花腩、鹹蛋黃、綠豆等，非常豐富。
狀元及第粥
狀元及第粥配料豐富，有豬肉丸、豬潤、粉腸等。豬潤鮮甜無腥味；粉腸爽滑彈牙。而配料經生滾粥煮過，令粥底更鮮甜。
北菇滑雞粥
生滾嘅北菇滑雞粥，雞肉鮮嫩而粥底帶有雞油嘅香味之外，細味一下仲有淡淡嘅北菇香味，充滿層次感。
