【Now.com】美國對等關稅措施成為呢個禮拜新聞焦點，由於總統特朗普基本係對全球各國加徵關稅，而且涉及範圍廣泛，各行各業、各種產品嘅定價同供應都受到影響，其中包括攝影產業，由於喺美國買到嘅攝影設備，大多數喺海外生產，美國消費者好大機會要承受對等關稅所帶嚟嘅價格上升。
產品定價係一項複雜嘅計算，一部相機、一支鏡頭在某個國家地區生產，但唔等於可以簡單只計算生產地點而定出售價，因為相機涉及大量零件，可能喺多個國家製造，因此情況變得相當複雜。另外，相機公司可能會將「相機A」放喺「甲國家」生產，「相機B」就安排喺「乙國家」生產，所以今後同系列內唔同相機，可能會出現不一致價格變動。
以三大相機品牌，Canon、Nikon同Sony為例，三間公司總部都喺日本，現時Nikon同Sony已經將大量生產移至泰國同中國大陸，Canon就將入門/低階設備喺中國大陸、台灣、泰國生產，但同時日本亦設有部分生產線。特朗普對來自日本嘅產品關稅定於24%，來自泰國嘅產品就36%關稅，呢個情況下，Canon喺日本生產嘅產品，可能會比Nikon同Sony喺中國大陸或泰國生產嘅同類產品更有競爭力，最終要睇產品發貨地點。
相當新聞：
特朗普嘅對等關稅政策，目標係要迫使廠商將生產線轉到美國，但有分析指，相機公司與日本有密切關係，佢哋寧願將生產搬返日本，達致得到較低關稅待遇，都唔會將廠房搬去美國。所以美國對等關稅政策下，所有非美國製造嘅攝影設備，無論相機、攝影機，定鏡頭，價格都會上漲，美國消費者將要買貴相機、買貴鏡頭。
攝影周邊設備，好似三腳架、閃燈、相機袋，現時好多都係中國品牌，亦喺中國大陸生產，特朗普對華就啱啱再額外加徵50%關稅，總共徵收104%關稅，所以買DJI、SmallRig、PGYTECH、Godox、Viltrox等攝影器材產品，一定面臨更高關稅，售價將會上升。
