【A&M Diary】唔知由幾時開始，台灣菜同文青風就好似有一種不可分割嘅關係。嚟到屯門嘅人氣台灣菜餐廳：木玥巷，由踏入餐廳嘅木材質感裝潢，定係精緻擺盤嘅台式料理，都充滿住一種獨特嘅生活美學，令食客們享受味道之餘，仲有一份濃厚嘅台式情調同氛圍。
紅燒牛三寶拼盤
拼盤份量十足，包括滷蛋、雞翼、牛腱、牛筋、牛肚。大大塊又厚切嘅牛腱肉，肉質軟腍，牛味香濃；牛筋嘅滷水味濃厚，而且骨膠原十足；牛肚入味，爽口Q彈質感。
黯然銷魂安格斯滷肉飯
台式滷肉飯通常都係以豬肉為主角，但木玥巷改用安格斯牛肉，肉味濃郁，牛脂芳香撲鼻，重點係唔會太油肥淋淋。配菜當中有流心太陽煎蛋同韓國泡菜，泡茶嘅微辣加上蛋黃滋潤過嘅白飯，真係越食越滋味。
