【Now.com】好多人搭長途機因為無得躺平瞓覺，搞到好困擾，經濟艙乘客就特別辛苦。喺社交平台TikTok同Instagram流傳一種「搭飛機技巧」，聲稱可以瞓得舒服啲，但有關做法引起專家關注。
從網上流傳嘅影片，呢個技巧就係好似蝦米咁曲埋身體，將雙腿收到胸前，雙腳就放到座椅邊緣，然後將安全帶扣喺小腿，就會防止雙腳滑落，頭部靠喺膝頭瞓覺。呢類影片喺過去一年累積咗幾百萬次觀看，更引發熱烈討論。
美國空中服務員工會主席Sara Nelson，警告呢種做法絕對唔要得，直指咁做「極度危險」。佢接受美國有線新聞旅遊頻道訪問時話，安全帶嘅設計係要緊貼腰部，確保空中出現亂流、緊急降落時提供最佳保護，亦減少對其他人可能造成傷害。佢又提醒大家，呢種坐法可能導致法律風險，違反聯邦航空管理規定及機組人員指示，可以面臨最高罰款35,000美元。
有專家亦關注乘客在機艙內呢種坐姿，警告可能會增加血栓風險。哈佛醫學院一位血液科專家 Dr. Nathan Connell 表明，雖然目前無確切研究證明呢種行為會直接導致血栓，但強調任何限制血液流動嘅姿勢都可能提高風險。
Nathan Connell 指出，超過四小時嘅飛行可能會增加血栓風險，八小時以上嘅航程就係主要高風險群體。佢建議旅客保持攝取充足水分、穿著鬆身舒適衣物、避免限制血流嘅動作，飛行途中適當時候多走動。
資料來源：CNN
