【A&M Diary】以前嘅港式冰室，自設焗爐，烘焙自家出品嘅港式麵包，係那些年嘅常態；至於近年新興嘅冰室，可能為咗減省成本，甚少會投放資源製作自家麵包。而位於西環嘅山道冰室，雖然係區內新開嘅冰室茶餐廳，但都自設麵包焗爐，師傅定時出爐新鮮嘅麵包，成為我哋近期嘅最愛。
菠蘿油
新鮮出爐嘅菠蘿包夾上一大塊鮮牛油，雖然邪惡，但確實驚喜！菠蘿包夠軟熟，包面似菠蘿釘，非常香脆，加上牛油嘅加持，更加香濃。
蔥油太陽蛋豬扒飯
蔥油、蛋汁再加上豉油，已經非常啱拌飯！至於連骨嘅豬扒，肉質軟腍，醃得入味，而且索晒蔥油嘅油香，非常惹味。
