【A&M Diary】由一踏入火鍋店就俾迷人嘅粉紅色吸引住，雖則我A姐唔係一個粉紅色愛好者，但都被呢度嘅粉紅色迷惑到，未開餐已經可以無限selfie喇！而喺等位嘅時候，餐廳都安排咗小食同飲品俾大家食住等，但最開心一定係小朋友，因為呢度仲有寶寶樂園，小朋友都有自己嘅放電空間。
叫完嘢食就嗱嗱臨去調味吧攞醬汁同小食，除咗一般蒜蓉、辣椒同豉油，仲有芹菜碎、榨菜碎、韭菜花醬等等，真係夠晒混醬。
四季鍋底
四季鍋底即係我哋可以揀4種唔同嘅湯底，一次過試到4種唔同口味：
長生抗癌松茸野菌鍋 – 湯底個菇味超濃郁，香氣滿溢。
清涼解熱雪耳鮮椰子鍋 – 呢個係我哋一致推介，椰香十足，未開始打邊爐，我哋已經飲咗幾碗湯喇。
滋補養生香辣鍋 – 有得揀大、中、小辣，辣得嚟好香，都唔錯。
維他命C蕃茄玉米鍋 – 呢個係我哋一致推介二，佢哋嘅蕃茄十足，超香濃。
