【A&M Diary】黃大仙係香港一個住宅區，所以有唔少地道美食，而且價錢仲係親民價添！今日就嚟到家常麵，呢間小店主打上海菜，仲有多款餃子同小食，而餃子更加係老闆娘手工製作，夠晒新鮮好味。另外，餐廳老闆事事親力親為，對每樣食物一絲不苟，仲會客氣問吓唔同食客嘅意見，精益求精之外，更充滿人情味。
手拍青瓜
麻味同辣味比例啱啱好，青瓜夠爽脆入味，唔食辣嘅都食到，適合香港人嘅口味。
紅油白肉
白肉唔會太肥，肉質軟腍，每塊白肉都夾滿蒜泥，加埋底下吸晒紅油醬汁嘅青瓜同粉皮一齊食，口感更豐富。
白菜豬肉餃、韭菜豬肉餃
韭菜豬肉餃嘅韭菜十足，充滿韭菜濃郁嘅香味，鍾情韭菜嘅朋友絕對唔可以錯過；喜歡淡口味就推薦白菜豬肉餃，充滿肉汁，同樣食唔停口。但秘密武器係自家秘製辣醬，令餃子提升至另一個層次呢！
