【A&M Diary】「你竟然無食過華嫂冰室？！」今日同A姐諗緊去邊度食飯，先發現原來佢從來都無食過華嫂冰室。華嫂冰室之所以一直人氣高企，係因為得到周潤發、余文樂等香港明星嘅加持，加上食物口碑極佳，所以除咗本地人，亦有好多遊客會專登排隊，一睹風采。最後，我哋嚟到灣仔分店，等大鄉里嘅A姐初嘗華嫂冰室。
招牌菠蘿包
菠蘿包依舊係無菠蘿嘅，但就加上咗牛油、太陽蛋同蕃茄。一啖飽落去嘅時候，菠蘿包除咗夠鬆脆，因為蕃茄同太陽蛋，令到佢超級Juicy，爆晒汁。由軟熟嘅菠蘿包、細滑嘅牛油、嫩滑嘅雞蛋同清爽嘅蕃茄，口感非常豐富！
煎蛋鹹牛肉雞翼芫荽皮蛋米線
呢到嘅湯底有五款：清湯、蕃茄湯、冬陰功、喇沙同芫荽皮蛋湯；至於麵食就米線、米粉、通粉同出前一丁，再加上配料：牛肉、豬扒、雞翼、午餐肉、芝士腸等等。我就揀咗我最愛嘅：煎蛋鹹牛肉雞翼芫荽皮蛋米線，其實我明明係叫鹹牛肉炒蛋㗎！Anyway，佢最大嘅重點都係佢個芫荽皮蛋湯，鍾意食芫荽嘅你絕對唔可以錯過！芫荽分量超多，成個湯底都係豐富嘅芫荽味，而且皮蛋大大粒，仲好香添！鹹牛肉同煎蛋就唔會有啲咩驚喜喇，但雞翼就好入味。
鮮茄豬扒通粉
濃郁嘅蕃茄湯底，酸酸甜甜，好開胃呀！同蕃茄湯底最夾嘅，一定係通粉，通粉完全索晒蕃茄湯，A姐話好滿足！至於香煎豬扒煎到微焦香，唔會太淋又唔會太硬，肉質嫩滑，必試推介！
