【A&M Diary】去台灣好鍾意搵啲文青cafe，由室內木系自然風，到窗外嘅青山綠樹，寫意又舒服。但估唔到呢種風格嘅cafe，原來香港都有，仲要喺紅磡呢啲鬧市中心。嚟到位於紅磡高山劇場嘅紅磡高山文化咖啡廳，讓你投入呢度恬靜嘅文化氣氛。
卡邦尼風乾火腿意大利粉
餐廳用咗自創嘅希臘式乳酪醬代替平時一般嘅卡邦尼醬，食落去同平時嘅味道一樣，但係無咁膩，與此同時仲會覺得比較健康。而且乳酪醬更杰，令意大利粉更掛汁！
香蒜辣椒秘製慢煮雞胸意大利粉
香蒜辣椒辣度偏易入口，唔會蓋過成個意粉嘅味道。而慢煮雞胸非常出色，雞胸好軟腍，肉質超級滑，非常之有驚喜！
黑芝麻芝士蛋糕、荔枝玫瑰芝士蛋糕
一食落口已經食到好濃嘅黑芝麻味，之後先慢慢有芝士味出嚟，極具層次。而且唔鍾意太甜嘅朋友都啱，因為呢款甜品有啲似食緊中式嘅芝麻糊；中意清新味道嘅可以揀呢一個荔枝玫瑰芝士蛋糕，一食落口已經有好清香嘅玫瑰荔枝味，繼而再食到非常突出嘅芝士味道。
