【Now.com】呢排天氣熱焫焫，唔少人出街都帶手提電風扇，幾乎機不離手！想拎埋把電風扇仔去台灣旅行就要多多留意，台灣桃園機場提醒旅客，禁止隨身攜帶或託運含有鉛酸電池的手提電風扇，鋰電池的手提電風扇就僅限手提上機，不得託運。
踏入暑假旅遊旺季，學生陸續放假，桃園機場公司好細心提醒大家如果去旅行要留意嘅地方，包括如護照有無過期、小心去錯機場等，機場公司提醒旅客出發前必須檢查清楚護照效期夠唔夠6個月以上。
當中有一樣要求對海外旅客，尤其經常去台灣旅行嘅港人相當重要，就係含有鉛酸電池 (LEAD-ACID) 嘅手提電風扇禁止託運及手提攜帶上機，話近一個月就截獲咗4,000 多件。鉛酸電池係技術比較舊，電極主要由鉛及其氧化物製成，電解液係硫酸溶液嘅充電池。有報道指，禁鉛酸電池手提電風扇上機嘅主要原因係安全考慮，鉛酸電池喺某啲情況 (例如過度充電或短路) 可能會過熱起火。
機場公司另外指出，為加快通關減少複檢，行動電源 (尿袋) 需隨身禁止託運、打火機限隨身攜帶一個，刀剪工具類 (例如：剪刀、美工刀及瑞士刀等)、高壓噴罐類 (例如：防狼噴霧等) 等僅限託運。
Photo / 桃園國際機場
