【A&M Diary】食港式嘅潮州粉麵，雲吞、水餃、魚蛋各有所好，但講到粉麵舖嘅靈魂，一定係嗰個又香又濃嘅腩汁。位於旺角嘅雄記牛腩王，喺門外路過已經聞到香噴噴嘅腩汁，作為我嘅comfort food之一，忍唔住入嚟食番碗先得。
牛三寶麵
牛三寶有齊牛腩，牛筋同牛肚，但重點當然係加上香濃腩汁嘅湯底。牛腩嘅肉味突出，肉質軟腍；牛筋膠質豐富，夠晒入味；牛肚彈牙爽口，同樣出色。至於麵底份量十足，夠晒飽肚。
咖哩崩沙腩飯
最正嘅當然係崩沙腩啦！崩沙腩係牛腩中最矜貴嘅部份，係牛肚皮嘅腩位，位於牛嘅橫膈膜附近，表面有一層橫膈膜連腩肉，呢個部份嘅肉質更軟腍腍，肥瘦適中。至於咖哩汁嘅辣味適中，用嚟撈飯一流！
