【A&M Diary】以為喺屋苑嘅餐廳就唔會有驚喜，點知位於九龍灣淘大商場嘅SuperNormal，佢嘅脆皮豬手真係一啲都唔Normal，食到我哋舔舔脷！而除咗豬手，餐廳亦有串燒、燒雞，叫埋杯啤酒就夠晒chill啦！
厚切牛舌芯
牛舌雖然厚切，但一d都唔韌，爽口嘅口感加上肉汁，絕對係除豬手以外嘅必點選擇。
柚子脆皮豬手
嘩！超大隻呀！柚子脆皮豬手個外皮炸得勁脆，而肉質非常嫩滑，生熟程度啱啱好，一啲都唔乾。重點係充滿膠質嘅骨膠原，非常滋味。味道方面，唔會太鹹，仲帶有微微嘅柚子香味，一啲都唔膩。
黑松露野菌扁意粉
黑松露野菌向來係creamy界嘅代表，意粉索晒黑松露香味之外，仲有淡淡嘅蒜香味，充滿層次。
白桃四季春茶、菠蘿荔枝四季春茶
飲品方面就點咗兩杯水果特飲，咁啱兩杯都係用咗四季春茶做base，讓水果嘅果香滲入青茶嘅優雅味道。
