【A&M Diary】雖然我哋唔係從事建築，但其實每個人都隱藏住地盤佬嘅細胞。所謂嘅地盤佬其實即係麻甩性格，約埋成班朋友一齊大吃大喝，咁至係地道港仔。今日就嚟到元朗百味軒，同班兄弟食吓小炒打冷，飲吓啤酒，聚舊就係咁簡單。
薑蔥霸王雞
霸王雞上鋪滿大量薑蔥，令雞肉加添薑同葱嘅香味，充滿層次。至於雞肉肉質嫩滑，肥瘦度啱啱好。
百味軒小炒王
去親大排檔，唔知點解都好自然叫小炒王。小炒王以韮菜花做主打，加上蝦乾、魷魚、腰果等配料，味道鹹香十足，送啤酒一流。
蠔餅
百味軒嘅蠔餅相信係佢哋嘅主打，蠔餅非常鬆化，蠔仔份量唔少，粒粒飽滿，充滿口感。
白飯魚煎蛋
兒時最鍾意嘅餸菜之一！白飯魚嘅鹹鮮味，真係可以添飯呀。
